Өңірлер бойынша ең жоғарғы инфляция Ақтөбе облысында тіркелді

Елімізде өткен айда азық-түлік тауарлары – 1,4%, азық-түлікке жатпайтын тауарлар – 0,9%, ақылы қызметтер 0,7% өсті, — деп хабарлайды AkтobeMedia.kz.
Бұл туралы стратегиялық жоспарлау және реформалар агенттігі Ұлттық статистика бюросы мәлімдеді.
Азық-түлік тауарлары арасында көкөніс бағасы айтарлықтай өскен, қаңтарда қияр – 22,4%, пияз – 16,7%, қызанақ – 8,8%, тәтті бұрыш 6,5% қымбаттады. Күріш – 2,9%, ұнтақ жарма, жаңа ауланған немесе салқындатылған балық– 1,8%, қара бидай-бидай наны, жұмыртқа – 1,7%, сұлы жармасы, шошқа еті, айран —1,6%, сондай-ақ тауықтың төс еті, сүт, тұзды iрiмшiк, жемістер, ауыз су 1,4%-ға қымбаттаған. Ал құмшекер 1,9% арзандады.
Азық-түлікке жатпайтын тауарлардың ішінде қаңтарда жуу және тазалау құралдары қымбаттаған. Мәселен, өткен аймен салыстырғанда кір жуғыш ұнтақ – 3,9%, ағартқыштар – 3,5%, ыдыс жууға арналған құралдар – 3%, кір сабын 2,7% өсті. Тұрмыстық техника бағасы, керісінше, түсті, мәселен, шаңсорғыш – 1,6%, қысқа толқынды пеш – 1,3%, ас үй плитасы 1,1% арзандады.
Өткен айда ақылы қызметтердің бағасы 0,7% өсті. Бағалардың өсуі нотариус қызметтеріне – 12,6%, күндізгі стационарда емделу – 5,2%, жерлеу бойынша ритуалды қызметке – 4,7%, стоматологиялық қызметтерге 2,5% байқалды. Коммуналдық қызметтер бойынша қоқыс шығару тарифтері – 2,8%, тұрғын үйді күтіп ұстауға жұмсалған төлем – 1%, орталықтан жылыту 0,8% өсті, ал тарифтің төмендеуі су бұру қызметінде байқалды. Яғни бұл — 0,2%.
Өңірлер арасында ең жоғары айлық инфляция Ақтөбе облысында – 1,7% (орташа республикалық деңгейден 0,6 п.т. жоғары), ең төменгі – 0,7% Алматы облысында тіркелді.